19 წლის ქართველი "დევი" ევროპისა და ამერიკის დასაპყრობად ემზადება

19 წლის გურამ რუსიტაშვილი ერთდროულად 12 ავტომობილის კბილებით გაწევას აპირებს. სულ პატარა იყო, როდესაც განსაკუთრებული ფიზიკური ძალა გამოავლინა. 3 წლის ასაკში მამის ავტომობილი ბორდიურიდან გადააგდო, თანაც მაშინ, როდესაც მამა საჭესთან იჯდა... რაში იყენებს 19 წლის ახალგაზრდა განსაკუთრებულ ძალას, როგორია მისი ცხოვრების წესი და რას აპირებს მომავალში, ამას თავად გურამი გვიამბობს.

- გურამ, რატომ გადაწყვიტე, რომ კბილებით 12 ავტომობილი გასწიო?
- ეს იდეა მამაჩემს ეკუთვნის. ჯერ კიდევ ძალიან პატარა ვიყავი, რომ მკითხა, - არ გინდა, კბილებით მანქანა გასწიოო? - კი-მეთქი, ვუპასუხე და... 8 წლის ვიყავი, "გოლფი" რომ გავათრიე, "გოლფს" ჯიპი მოჰყვა, ჯიპს - "მარშრუტკა", მერე ოთხი ჯიპიც გავწიე... ახლა რეკორდის მოხსნა მინდა. რამდენიმე დღეში შვიდი მანქანა უნდა გავწიო, რეკორდს ასეც მოვხსნი. 12 მანქანას კი მომავალ წელს გავწევ. მთავარია, სპონსორი ვიშოვო და მსაჯები ჩამოვიყვანო. დარწმუნებული ვარ, რომ რეკორდს მოვხსნი, ჩემი თავის იმედი ნამდვილად მაქვს. მერე ევროპასა და ამერიკაში, სხვადასხვა ტურნირებშიც მივიღებ მონაწილეობას.

***
- ავტომობილი ფულის გამო თუ გაგიწევია?
- არა, V კლასში რომ ვიყავი, 5 "სნიკერსზე" გავწიე მანქანა და მამაჩემმა მაგრად დამცინა...

- მითხრეს, რომ ერთხელ ევაკუატორის ფუნქცია შეგისრულებია და ხევიდან ნაავარიები ავტომილი ამოგითრევია...
- კი, მაგრამ ეგ კბილებით არ გამიკეთებია, მხრებით ამოვათრიე.

- ხელით რამდენი კილოს აწევა შეგიძლია?
- 350-კილოგრამიან შტანგას კისერზე ვიდებ და ბუქნებს ვაკეთებ...

***
- კვების განსაკუთრებული რეჟიმი გაქვს?
- არა, როგორც ყველა ქართველი კაცი, მეც ისე ვიკვებები. თუმცა, მინდა, რომ რეჟიმში ჩავჯდე და მხოლოდ ნატურალური პროდუქტი მივიღო. ისე, ყოველ დილით ერთმანეთში არეულ თაფლს, ნიგოზს, ნუშსა და თხილს ვჭამ. ზოგჯერ ერთ ჭიქა ნატურალურ ცივ რძესაც დავაყოლებ ხოლმე.

- სიგარეტი, სასმელი?
- სიგარეტს არ ვეწევი, სასმელს ძალიან იშვიათად ვსვამ. თქვენი ჟურნალის საშუალებით ახალგაზრდებს ვთხოვ, სიგარეტს ნუ მოსწევენ, საკუთარი ნებით ნუ გაინადგურებენ თავს, გავუფრთხილდეთ ჯანის სიმრთელეს...

***
- ახლა ის გვიამბე, 3 წლის ბავშვმა მამის ავტომობილი რატომ გადააგდე ბორდიურიდან?
- მამაჩემი დილით მანქანას ვერ ქოქავდა და მითხრა, - მოდი, მამი, მოაწექიო. მეც მივაწექი და...

- ქუჩაში ხშირად ჩხუბობ?
- ქუჩაში ჩხუბს ყოველთვის თავს ვარიდებ, მიმაჩნია რომ ყოყოჩობა ნამდვილი კაცის საქმე არ არის.

- არც გოგოს გამო გიჩხუბია?
- გოგოს გამო კი მიჩხუბია, მაგრამ ეს ადრე იყო, როდესაც სკოლაში დავდიოდი.

- შეყვარებული გყავს?
- არა, პირად ამბებში არ მიმართლებს...

წყარო